Nú er sól

Já nú er sólin farinn dansa hálfann sólarhring yfir sjóndeildarhringnum hérna á Norðurhjara held ég geti sagt það að við eigum heima á Norðurhjara þessar jarðkringlu. Þegar þetta er skrifað 23 mars 2025 höfum við dagsljós í 12 klukkustundir og 47 mínútur það þýðir að dagurinn er orðinn lengri en nóttin. Vorjafndægur var hérna kl 1001 þann 20 mars. Þetta er mikil breyting frá því að ég skrifaði síðast þann 9 feb þá var dagurinn aðeins 6 klukkustundir og 9 mínútur og ef við spólum enn lengra aftur þá var bara enginn dagur, dagsljós þann 1 janúar þ.e.a.s sólin komst ekki eða náði ekki upp fyrir sjóndeildarhringinn. 

 

 

 

Ef við leikum okkur aðeins meira með sólina sem reyndar skín nú inn um stofugluggan hjá okkur kl 0610 að staðartíma hér í Båtsfjord. Sólin mun setjast kl 1732 í dag og þegar hún fer niður fyrir sjóndeildarhringinn á eiga gráðurnar á kompásnum eða kompásskífunni að sýna nákvæmlega 276 gráður sem er 6 gráður norðan við vestur, á morgun 24 mars kemur hún svo upp fyrir sóndeildarhringinn kl 0440 og þá skal skífan vísa 83 gráður eða 7 gráður sunnan við austur. Þessi fróðleikur segir okkar að sólin kemur upp eða sest norðan eða sunnan við háaustur eða hávestur eftir hvar við erum stödd á jarðkringlunni þ.e.a.s miðað við miðbaug og árstíma. 

Veðurfar hér á norðurhjara hefur verið mjög sérstakt í vetur hálfgert íslenskt veðurfar með miklum vindi og miklum sveiflum í hitastigi eins og í byrjun febrúar fór hitinn frá -15 gráðum í + 6 gráður á rúmum sólarhring, þetta veðurfar hefur heft sjósókn mikið og margir bræludagar verið þennan veturinn. Með hækkandi sól í lok febrúar fengum við loksins lágdeyðu og loftþrýstingshæð hingað austur og gátum róíð í ca 10 daga án þess að þurfa að skoða veðurkortið  veðurspána.

Loðnan sá litli prótínríki fiskur sem á það til vera dyttóttur hér eins og við Íslandsstrendur kom snemma í ár við byrjuðum að vera varir við loðnutorfur um miðjan feb og þegar loksins var komið almennilegt veður var fiskur kominn í loðnuna hérna á heimamiðum svo við línubátarnir máttum sækja langt til hafs til fá ýsuna til bíta á krókinn.

Já við höfum verið að eltast við ýsuna til að reyna drýgja lítinn þorskkvóta, en eins og tíðin hefur verið þennan veturinn, varð það frekar rysjótt en við náðum þó að bjarga vetrarvertíðnni fyrir horn á þessum 10 dögum nú í byrjun mars en það var langt róið 72 sjómílur aðra leiðina NV á Nordkappbanken sem er fiskibanki sem teygjir sig frá Nordkinn og vestur fyrir Nordkapp. frekar stórt svæði en við vorum sem sagt að róa í austurkantinn á bankanum og þar var góð ýsuveiði stór og fín ýsa. Vorum við 3 bátar héðan sem rérum þangað flestir heimabátarnir skiptu yfir á net og tóku þorskkvótann upp 1-2-3 en mokveiði var í netin. það hefði því verið auðveld skipta yfir á net og taka þorskkvótann í ca 3 róðrum og svo bara upp með tærnar og sleppa róa eftir ýsunni .

Hér komum við í land eftir róður á Nordkappbanka en ca 2 sólarhringar fara í svona róður þar af 19 tímar í siglinguna til og frá miðunum og liggja ca 800 ltr af diesel olíu eftir túrinn

 

 

 

 

 

 

 

Núna erum við búinir leggja Solrun B fram yfir páska, þar sem við verðum eiga þorsk fyrir vorvertíðina en planið er að reyna áfram við ýsuna og síðan kemur grálúðan í lok maí , svo planið er að reyna öngla eitthvað upp í maí og júni og skipta svo yfir á ufsanet 1 júli þegar ferskfiskordningen byrjar með 20% leyfilegum meðafla í þorski.

 

 

 

 

 

 

Á meðan Solrun B liggur í ró ætlum við að starta Minibanken og taka þorskkvótann þar en eigum við 11 tonn af þorski þar. Ætti það ganga snurðulaust 7-9-13 við förum með vormline eða polarlinu , yfirleitt þegar þorskurinn er búinn að éta sig fullann af loðnu tekur hann vel í krókinn þegar hann byrjar vera hungraður á nýjan leik þá er vormína mjög hentugt veiðarfæri girnislína sem við fleytum frá botni með netahringjum eða snurvoðareggjum ca 3 faðma síðan er steinn á móti sem liggur í botni. Beitum við línuna með rækju en þorskurinn líkar rækju best þegar hann er byrjaður finna til svengdar á nýjan leik. Oft er hægt að fá 400 til 700 kg á balann af þorski s.s þægilegur veiðiskapur fyrir minni báta. Mesta sem ég hef verið með að fá eru 2,8 tonn á 3 bala eða 933 kg á balann, það eru 240 krókar í einum svona bala svo það 3,8 kg á krók.

Í fyrsta sinn nú í ár  er borgað betur fyrir þorsk hér í Noregi en á íslenskum fiskmörkuðum frá því ég kom hér fyrst árið 2008 og byrjaði að bera þetta saman . Þorskverð er ca 30 til 40% hærra hérna en verðið var í fyrra svo þessi mikli kvótaniðurskurður sem varð hérna milli 2024 og 2025 hefur ekki haft áhrif á aflaverðmætið hjá flotanum þvert í mót hefur aflaverðmæti flotans aukist þar sem ýsuverð og ufsaverð hafa líka farið mikið upp , svo það má segja að ástandið sem miklu betra en reiknað var með. 

Svona lágur þorskkvóti hefur leitt til keppni  um hráefnið milli fiskvinnslana hérna og má segja í fyrsta sinn síðan ég kom hefur hreinlega verið verðstríð um fiskinn. lág Norsk króna hefur líka hjálpað til að vinnslunar hafa getað borgað svona vel  en norskakrónan hefur verið mjög veik á móti evrunni sem 80 % af fisknum endar líklega.